韓流村 (已結業)

位于尖沙咀嘅韩流村，由韩国引入地道烧烤，仲用埋韩国厨师提供地道烧烤同别致菜式。加埋佢地用圆台，成个Friend饭局坐埋一齐吹水烧野食就系咁简单！餐厅装潢极具街头风，室内空间充足，坐喺圆台，成班朋友一齐围埋食住烧肉吹水最开心！食韩烧配料非常重要，呢度都算几好食，尤其泡菜唔会过咸，甜甜地带点辣，配搭起嚟好加分！而且前菜仲系无限任添㗎。选用西班牙黑毛猪，脂肪分布平均，肉质结实又爽口，加埋泡菜食更加惹味！韩国蓝蟹直送香港，再喺香港新鲜腌制。就咁食个蓝蟹多膏鲜甜，食落有少少咸香，随蟹仲会附送6旧紫菜饭团，一齐食更滋味！只需要将饭团加落蟹盖，再混和蟹盖本身有嘅酱汁同蟹膏食，食起嚟感觉鲜甜、别具风味，一定要试！食韩国菜当然唔少得炸鸡，辣之中带点蒜香，酱汁惹味香浓。入口嘅时候，外皮香脆但唔会硬，唔会成块皮剥落，一啖咬落去可以一次过食晒鸡皮同鸡肉。佢地仲有原味同蒜味炸鸡，就算唔食辣，都一样可以食到。