Hea Ha Hea Ha 居酒屋

营业中

休息中

上星期揾到尖东楼上一间日式餐厅，好多菜式都比较少有机会食到，而且好啱咁热嘅天气食，值得一试。前菜炸芝士配酸萝卜同笋两款渍物，惹味嘅芝士同酸得嚟爽口萝卜同笋，降温又开胃。先叫咗冲绳苦瓜秋葵沙律，冲绳苦瓜好清爽，而且苦中带甘，配埋海带柚子丝同饭素调味，成个沙律酸微微咁，健康又消暑。牛小排串，食得出师傅嘅功架，外面焦香，入面嫩口juicy，牛小排肉质有咬口，仲加咗椒盐调味，食落口感满分。豚肉芦笋卷，油脂感十足嘅豚肉配合爽口嘅芦笋，好夹又唔会太油腻。烧原壳日本岩手生蚝，生蚝够晒厚肉，加咗番红花，别有一番风味。盐烧大白鳝，鱼肉弹牙肥美，皮好脆，一啖咬落去好有满足感。日本味噌牛什煮，好少见日式嘅牛杂，唔同部位都煮到好入味，而且落咗番红花同海带调味，口感丰富。烧日本淮山，望落去成粒带子咁，食落爽口，既健康又好食。最后叫咗玉子烧，甜得嚟带少少咸味咸咸地，系一个完美嘅收结。