食力點心·雞煲專門店 (已結業)

今次嚟到尖沙咀呢间食力试鸡煲加火锅，价钱几经济，冷气配置尚可，环境尚算舒服。果度嘅侍应服务非常好，仲有个操流利广东话嘅外籍姐姐好有趣、好识讲笑。而食鸡煲同打边炉之前，好特别嘅系会有点心拼盘比你做前菜，里面有潮洲粉果同金黄色嘅云南野菌饺。值得一提嘅系佢哋个云南野菌饺入面非常足料，香喷喷、金黄色而且热度都非常足够，而惊潮洲粉果入面有马蹄或者有阵草青味嘅朋友可以试下呢个！再讲佢个鸡煲啦，我嗌左小辣觉得个辣度啱啱好，都好足料，配料大概系用左香茅、辣椒、干葱等嘅材料去整，所以都几惹味。另外啲鸡嘅口感都可以，亦都唔算「鞋」。食到咁上下佢就会帮你加清汤底，比你任叫打边炉，都系青口、肉类、粉面等任叫嘅野食。值得一赞既系个和牛，食落口感不错，而且牛肉肉味都好劲啊！另外佢啲肉丸（墨鱼丸、猪肉丸等）系手打嘅，所以口感都唔错，而且唔算太多粉搓。整体而言，呢间食力价钱都几平，服务态度同食物质素都唔错！钟意打边炉嘅大家可以去试试。