北海道爐端燒 (已結業)

同好耐冇见嘅朋友出街夜晚食饭梗系要坐得舒舒服服，好好咁样倾吓计啦。今次我哋拣咗系亚士厘道嘅楼上嘅居酒屋，饮返两杯慢慢坐低倾好好倾一晚计。平时去开居酒屋一般都系食串烧居多。今次叫左稻草烤安格斯牛扒同稻草烤塩鲣刺身呢啲平时系一般居酒屋好难食到嘅烤物。哩一个安格斯牛扒会系我咁多样𩠌最最最最钟意食嘅一碟，佢烤出嚟有好大浸浓烈嘅烟熏香味，外面香脆，肉汁丰富，入面亦都保留着安格斯牛嘅软腍松化，配上葱花同埋蒜片，真系一流。而烤嘅刺身我亦都系第一次食。除咗会保留着本身坚鱼嘅鲜甜鱼味，亦每一啖深透住熏烤嘅香味，配上特别嘅酱汁令舍开胃。哩两道菜式我真系几推介大家都去试下！日本酒煮大蚬亦都系我同朋友其中一个一定会叫嘅嘢。用咗两款蚬肉，鲜味十足。蚬肉嘅鲜同酒吸收落晒系个汤度，每次都一定饮晒个汤啊哈哈。黎得居酒屋当然都唔少得手羽先同牛舌啦。牛舌系厚切，但略嫌有少少un。仲有不得不提佢嘅鸡泡鱼干。鸡泡鱼干烤得相对腍身，我本身唔太钟意食其他居酒屋嘅鸡泡鱼干因为佢哋烤到好干，而且偏硬身，但呢间鸡泡鱼干我几钟意，用黎送清酒真系冇得顶。