Delaney's Kowloon

营业中

休息中

记得细个第一次去Delaney's 系喺湾仔嘅分店。𠮶阵觉得呢个pub极有传统英式风情，好多外国人喺度睇rugby或者英超，又多啤酒饮。之后因为湾仔间分店租约期满而冇咗，我就多咗嚟尖沙咀呢间分店啦。难得今日同同事喺尖沙咀开会，开完会梗系happy hour连晚餐。虽然得返我哋两个女仔食饭，不过我哋叫咗一打鸡翼同一个辣肉肠Pizza。由于我哋都怕寒凉嘅关系，所以都系叫咗两杯house red。两杯红酒一嚟到，已经闻到好香带熟透嘅果味，再饮一啖，劲易入口，完全散发着车厘子同莓嘅味道，好有pinot noir嘅风格。之后鸡翼同辣肉肠Pizza嚟到，鸡翼炸得好脆，每只都好肉地，配埋泰式辣酱，啖啖肉又香口，超爽皮。至于个Pizza今次就整得一般啦！薄饼底过多水分，黐住咗焗Pizza垫底张纸，中间位唔够脆，变咗好大嚿又黏嘅粉团，唔系太好食。唯一系面头都叫做多芝士同辣肉肠，所以我哋就挑晒上面啲料嚟食。总括而言，今餐最好嘅系可以好舒适、唔太嘈咁坐喺个酒吧饮住嘢、食住嘢倾计，炸鸡翼唔错，红酒都好饮，完全满足两个女人不停呻气嘅欲望。