梨滿園韓國料理 (已結業)

自己对韩国其实无咩好感，唯二钟意嘅系韩国菜同韩国菜（自行理解），尤其喺英国嘅日式烧肉唔常见，韩式烧肉就成为咗代替品，食得仲密过喺香港果阵。呢间舖虽然旺角都有分店，不过旺角估计人多难等位，就走去乐富呢边，屋村地方应该坐得舒服啲又唔使咁赶。果然就算正值晚饭时间，都可以顺利walk in有位，如果系旺角要等卡位真系睇吓时运高唔高。即刻睇个餐牌，见到有二人同三人套餐，睇落又唔算贵，不过里面无烧肉都系散叫啱我啲。 我系好钟意食烧牛舌，所以叫咗客，呢度嘅牛舌系薄切版，个人比较钟意厚切多啲嘅老实讲，不过以份量计佢咁多块其实都几抵。块牛舌食落去唔系爽脆嘅口感，而系比较软熟嫩滑，仿如食高级牛肉。作为港猪当然要食吓同类，佢有只济洲岛黑毛猪五花腩，唔知又有咩唔同？睇见佢纹理分布都几平均，同时又无话太多肥膏，似乎唔错。块五花腩无经过腌制都几大胆，证明佢对块肉好有信心。食落果然无令我失望，肉香够突出同时无膻味，有丹麦猪嘅感觉，少少油脂令味道更丰富，果然一分钱一分货。喺爱丁堡食过韩国人开嘅餐厅，仲系米芝莲级数嘅焖猪肋骨，热辣辣食都OK，一冻咗甜到飞起，鬼佬就系鬼佬…返到嚟香港试返亚洲口味，就拣咗个细嘅红焖牛肋骨。