乜嘜雞蛋仔

营业中

休息中

屋企附近嘅小商场前排转手加大翻新，除咗引入几间连锁快餐店之外，仲有呢间小食店，放工见到有唔少人等外卖，好奇之下我都加入趁下墟。小食店原来同旁边嘅清玉相连，一边卖小食一边卖饮品，双剑合璧。除咗香喷喷嘅鸡蛋仔同格仔饼之外，仲有烧卖、鱼蛋、肠粉同捞面等港式小食，价钱合理。竹炭鸡蛋仔概念新鲜，夹心加入带有咸味嘅芝士粒，蛋味亦算香浓，但如果外皮可以香脆啲就更好。抹茶格仔饼加入红豆、练奶同花生酱，红豆保留少少口感，格仔饼外皮微脆，内里香软，咬落透住淡淡嘅抹茶味同蛋香，成个配搭非常夹，绝对唔能够错过。肠粉餐有五条肠粉配烧卖同鱼蛋各三粒，份量唔少，相当抵食。热辣辣嘅肠粉够哂滑嫩，伴上大量甜酱、麻酱同白芝麻，系久违嘅滋味。咖哩鱼蛋亦同样抵食，口感弹牙，配上香辣嘅酱汁非常惹味，屋企人都大赞。牛肉烧卖比起平日食到嘅结实些少，牛肉味浓，但同其他几款小食比较就冇咁出色。难得小商场亦吸引到优质小店进驻，小食质素唔错，而且价钱合理，难怪人气咁旺，相信自己亦会成为常客，希望小店保持水准，造福街坊。