龍順軒海鮮酒家

营业中

休息中

依间龙顺轩位于彩虹同牛头角之间，可达商场嘅马路只系通往彩德邨同彩福邨嘅一条掘头路， 可以够胆讲呢间酒家就只系做呢两个邨嘅生意。依间酒家响两三年内已帮衬过好几次。屋邨酒家自然都系大路烧味小菜。第一个菜就系特价菜清蒸龙趸仔$58，虽然今次条鱼蒸老咗，不过骨唔多，啖啖肉，味道都唔差， 明显系食价钱，海鲜㖞！菜心炒牛肉，菜心还可以，牛肉就得松肉粉味，志在有蔬菜食吓咁啦。烧味双拼，超好彩，厨房畀鸡髀油鸡味道就一股烧味店水准；叉烧就可以赞吓，几年内响度食过咁多次都可以保持美味水准。肉质松软，肥瘦适中，既有肉香又有脂肪香，咸甜调味又刚刚好，是晚一路食一路眼见不时有邨民到烧味部外买，相信依个叉烧一定留咗唔少依两个屋邨嘅街坊捧场客。是晚例汤，佛手瓜猪骨汤，粤式老火汤。除咗油多咗少少，无其他投诉。三𩠌一汤有海鲜埋单$359，份量其实够三人食，所以大部分叉烧被打包，足够一个人食多餐。