Food Combo (已結業)

今日嚟咗屯门嘅V city行街，行完梗系要揾啲好嘢食啦。新开无耐呢间餐厅，望落去光线充足，装修设计简约舒服～餐厅主打健康嘅西式定食，价钱由100到200不等，每款都有餐汤、沙律、主菜、小食同埋水果。每个set都唔同㗎，好有心思！点完餐之后仲可以去水吧，有三款唔同嘅饮品拣，非常健康又清新，包括有适合养生女士嘅「红枣桂圆杞子水」，适合热辣辣天气饮嘅「薄荷鲜橙水」同埋「鲜柠檬茶」～不论系汤、沙律、同埋水果，都系由厨师亲自制作，唔会假手于人，好欣赏佢哋为西餐定食注入健康嘅元素，好适合我哋香港人，亦都睇得出佢哋好有诚意！我哋叫咗一个「香煎挪威三文鱼柠檬牛油果汁配特色鸡翼」，三文鱼外皮香脆，肉身鲜嫩，鸡翼都非常入味。另外叫咗个「美国安格斯西冷牛扒荷兰汁配南瓜薯饼」牛扒肉质嫩滑，呈粉红色，咬落juicy。我哋八点嚟到，已经出现人龙，大家想食就要早啲到啦。好推荐大家嚟食，小店位于比较贵重嘅V city附近，希望做得着啦！