段純貞牛肉麵 (MONTEREY Place) (已結業)

段純貞開到周圍都係，今晚終於有機會試下！星期五晚上店舖都幾清幽，坐得舒服。食物選擇都好多，除咗有麵外，仲有小食、滷水、飲品同甜品。而麵仲可以揀手公麵或細麵。犇牛四寶麵（$108）- 呢碗麵好豐富，有厚身嘅牛腱、牛筋、牛肚同嫩五花，啱晒咩都想試下嘅朋友。麵食仲配上一小碟酸菜。而啲牛肉全部都好腍而入味。手公麵亦非常之岀色，食落好彈牙。招牌紅燒腱心牛肉麵（$86）- 呢個都好好食，腱心勁厚身同入味，但卻完全唔韌，仲有好多舊添！養生無骨紅棗黃酒雞（$84）- 雞肉非常嫩滑，帶點酒味卻又不會過多，配上紅棗同杞子更顯清甜。滷水鴨腎（$98）- 鴨腎好爽口，底下仲有索晒滷水汁嘅豆腐。台式綜合豆花（$45）- 我碗豆花就揀咗熱，熱嘅豆花係我最鐘意食～所謂綜合有綠豆泥、薏仁、紅豆、黑糖珍珠、芋圓同花奶，勁多料！口感仲好豐富添，必食！甘露芋圓（$45）- 楊枝甘露、愛玉、芋圓、芒果、小丸子同椰果。有好多芒果，更香。