燧記廚房 (荔安大廈) (已結業)

近排星期日唔想离开屋企，因为要留低煲返五集全民造星🤩。不过饭就点都要食嘅，而我会选择买外卖，边食边睇嘛。夜晚我哋开外卖App拣咗嗌「燧记厨房」，自取有九折优惠。我哋一去到外卖就经已准备就绪🥡，原来餐厅有少量堂食座位，但店舖面积较细，住附近的话买返屋企食会比较舒服。小店主打川味小菜🥢，款式总共有十多款，当中唔少都带有辣味。套餐同单点价只相差$5，而餐就多碗饭🍚同饮品/例汤，正常都会嗌埋吧。芳香惹味孜然牛肉($60/套餐)，估唔到呢碟牛肉落咗咁多辣椒同葱炒，辣味强烈🌶，再加埋孜然香，整体系一道几惹味嘅菜式，但千万要小心唔好咬爆辣椒籽。牛肉约有十片，肉质唔韧🐮。有内涵红烧马铃薯排骨($55/套餐)，呢道𩠌味道OK，但如果将排骨换上肉片会开心啲，因为唔使噒骨🐷🦴。菜式唔辣，咸度适中，唔重口味，而且仲有唔少薯仔粒🥔，外面煎香内里软淋。是日例汤系蛋花紫菜汤🥚，味道偏清淡，普普通通啦，唔要汤可转拣饮品。总括嚟讲，今晚终于夹啱时间初尝呢间经过多次嘅川味小菜外卖厨房😄。如果辣瘾起，可以考虑嚟呢度食食。题外话，我留意到有唔少港大嘅内地生嚟帮衬，相信佢哋认为口味正宗呢。