more food & creation (已結業)

早几日同老公&两位朋友去开牛头角附近，五点零钟见肚饿就周围揾嘢食～附近都系以茶餐厅、食堂为主，但呢间餐厅嘅装潢就好有格调，所以即时比佢吸引咗。虽然喺Openrice未揾到食评，但见佢环境舒适，好适合同好友倾偈聚会，所以最后都决定冒险一试！入到去，侍应生都即时好有礼貌咁接待我哋，仲向我哋推介佢哋不同嘅食品。结果四个人都各自点咗唔同食物，可以试多几款。我点咗海南鸡饭，啲无骨鸡好滑又好有鸡味，酱汁亦调得好好！老公食嘅冬阴公海鲜炒意粉我都有偷食，真系好特别，平时冬阴公都系汤，但用嚟炒都一样咁惹味～正！而两位朋友就分别食白汁碎蛋牛蛋包同冬阴公海鲜汤面。虽然我无试，但佢哋都大赞！除咗主食，饮品同甜品都值得推介～我哋三个都试咖啡，其中一位朋友就试朱古力，但同样都觉得好好味！至于甜品--芒果糯米饭同椰汁糕大家食完都盛赞，因为椰汁糕好特别，落咗斑兰㗎！而芒果糯米饭虽然都系一般咁用咗两只糯米，但烟靭得嚟好有口感，令我哋叫完再叫！整体而言，我哋四个觉得呢间餐厅好令人满意，见佢仲未有人写食评，就花少少时间做第一个啦！