山本吉列料理 (已結業)

身在葵涌区返工，有时亦几羡慕在尖沙咀中环返工嘅朋友，唔系因为靓女OL多，而系美食选择亦相对较好。不过，葵涌区都间唔中有惊喜，就好似在工厂区熟食市场入面，发现有间开左好耐但又唔起眼嘅日式饭堂，发觉款式唔单止多，价钱仲好经济实惠添...山本吉列料理其实开左都一年有多，主力做学生哥外卖多，舖面好细，其实平时好少人走去堂食。佢地主打咖喱饭及吉列食品，亦有各类日本和风小食。老板娘诚意推介我试日本咖喱黑豚猪扒饭($32)，见到咁嘅价钱就有黑豚食，毫不考虑就决定落单。等差唔多十分钟，新鲜即炸，热辣辣吉列猪扒饭送到，黑豚猪扒无其他吉列专门店咁厚身，但闻落香喷喷，咬落肉味香浓有弹性，而日式咖喱汁质感滑溜浓稠，中间夹杂水果香及鸡汤味，味道绝对系水准以上。唔好以为熟食市场外卖店做学生哥生意就马虎了事，米饭方面用上日本樱城米，粒粒圆润饱满，咬落充满米香，混上咖喱汁非常醒胃。成盒饭只系三十几蚊，仲有冻饮半价，叫杯冻柚子蜜只加四蚊，绝对收货!!