鐵牛台灣牛肉麵 (旺角中心第一座) (已結業)

之前冇意之中经过旺角中心旁边，发现有条楼梯，下面原来有几间食肆，其中一间就系「铁牛」。 「铁牛」系一间由台湾人主理嘅台湾食品专门店。行楼梯落去地库，就会见到有几间食肆，或者可以喺旺角中心，坐扶手电梯落去。外卖餐牌系一本黑色嘅书仔，连咁普通嘅外卖餐牌都做到咁靓，可见餐厅系几咁用心，有诚意。「铁牛」招牌菜系主厨私房牛肉面，咁就当然要试下。主厨私房牛肉面 $70外卖汤底系分开上，唔怕拎到返去啲面会变淋。汤底系牛肉面嘅精华，当然要细心品尝。深啡色嘅汤底，渗出浓厚嘅药材香气，味道浓郁，好够味。未开始食面，已经忍唔住饮咗4、5啖。再试试个面，面嘅份量颇多，面质烟靭，有口感。金钱展大大件，一半筋一半肉，易咬开，好好味。秘制牛腩果然秘制，唔错。肉质好腍而且入味，唔会煮得太干，有肉汁。牛筋我最爱，有嚼劲，爽口弹牙，感觉充满骨胶原。巧遇铁牛，牛肉面做得好出色，诚意之作，必定会再 encore。亦推荐俾爱吃牛嘅朋友仔~