Pho Bar (已結業)

中环既利源西街非常狭窄，充满各种街档，但其实两旁不乏好餐厅，今日中环上班族带我去左Pho Bar。Pho Bar如利源西街一样狭窄，不过餐厅安排更多吧枱坐位，所以出入都算畅顺。Pho Bar主要卖Pho同喇沙，小食亦有猪颈肉、薯条之类。喇沙卖相几靓，可以见到所有食材，包括豆卜、鱼片、虾、蛋等。米线口感爽滑，汤底散发浓浓虾香，不过无乜椰香味。食晒啲面之后，汤底仍然有一部份，证明面条唔太吸汤，令整碗喇沙唔会变成捞面。朋友叫既「至尊」并非浪得虚名，食材数之不尽，包括生牛肉片、牛丸、牛柏叶、牛展、札肉同牛腩。汤底味道几浓，而且唔会饮到好口渴。对我嚟讲最重要系可以自选配料，因为我个人好唔钟意芽菜，但自己经常忘记走芽菜。冰山烧猪颈肉几香口，不过有啲油腻，包埋生菜一齐食会好啲。平时餐厅既薯条离不开黑松露酱或蕃茄酱，但Pho Bar既紫色配日式盐味薯条有惊喜，竟然有明太子酱。一蘸明太子酱已经不能自拔，明太子酱唔会太咸，加上薯条热辣辣兼香脆，配搭非常出色。每人叫左一杯奶茶，奶茶偏向港式味道。食完之后有发现同一条街令我感兴趣既餐厅，下次再介绍大家。