龍津美食 (已結業)

大埔富善邨街巿喺一个冇冷气旧式街巿，龙津美食唔系场内独巿，但钟意佢光猛企理，食物有盖冚住。煎酿三宝中食过红肠、豆腐、茄子同尖椒，豆腐最好食，系斋豆腐冇鱼肉，炸到外脆内软，够香口，遇正刚炸起，好味指数加多分；红肠唔系切到纸咁薄，亦冇炸到变肉干。成个食物箱入面，自家制煎饺子最靓仔，见店员埋头包饺，买两只试吓，皮薄饀多，唔会食到油浸嘴唇。小店出品，食完唔会令人觉得惊为天人，胜在经济实惠款式多，睇得到店东花咗心机去经营。现实喺主打街坊客做十蚊八蚊生意，平日呢个街巿静英英，又要交租畀领展，希望佢同旁边的车仔面档可以撑落去喇。