南小館 (已結業)

作为「小南国」旗下走年轻路线既品牌「南小馆」，一入到去已经感受到果种清新既味道。装修非常光猛企理，以白色主打为主，令人不其然感受到充满活力既感觉！是日的公众假期虽然系星期五，但居然都有供应平时闲日既$180 lunch set，前菜、点心/面、饭/年糕同埋蔬菜每样一款，重要免茶免加一添，真系抵到烂！四小碟叫左冰宫肴肉、花雕白鸡、糖醋排骨同埋四喜烤麸。整体方面感觉都尚算唔错，肴肉做得几入味之余又唔会太咸同太肥，排骨同烤麸juicy之余亦都不失本身应有既味道，抵赞！唯一要批评既系D花雕鸡骨多过肉，份量好似少左D唔多够喉！老重庆担担面同坊间食到一般既担担面差唔多，只系面身略为腍左少少，不过尚可接受。唔知系咪冇叫到「少辣」既缘故，辣度比一般既「普通辣」重手好多，如果唔食得辣既人要记住叫「小辣」呀！大良炒饭方面，份量都叫做合理，唔好睇佢好似好细，将D饭摊开之后都可以舖满成个碟面架！不过炒饭就略为油左D同咸左少少，虾仁亦都淡口左少少令味道差咁D，不过都可以接受。清炒菜心呢都系D基本野，冇乜难度可言，同一般中式酒楼食肆甚至茶餐厅食到既差唔多，不过因为用左蒜蓉炒，所以一食就食得出「镬气十足」既感觉，正