佳記美食 (上海街)

营业中

休息中

呢日去完廖孖记买腐乳，就嚟到呢间平食两𩠌饭店医肚，两𩠌一饭，分别系南乳猪手及椒盐猪扒$33再加$2热饮奶茶，一共$35，起呢区算系平价，但抵唔抵食又系另一个问题。猪手一睇啲骨切得咁整齐就知系雪货，当然，咁嘅价钱，唔通会畀鲜货你食咩？品质系大路货，即系腍得嚟有啲爽，而唔系我喜欢嘅腍滑𠮶种，而且要焖到腍滑嘅话，长期保存亦系一个难题，所以收货。椒盐猪扒就系失望，失望嘅唔系因为佢唔脆唔够热，老实讲，呢啲煮定一大盘嘢，预咗佢放咗好耐，所以可以接受。失望嘅系佢连我呢个食得好小辣嘅人，都完全食唔到辣，呢个𩠌系要够脆，少少咸，少少辣先至叫好食，否则真系唔煮好过煮，唔食好过食。更差嘅系碗饭，烂到好似畀老人院嘅长者食咁，完全唔掂，我为免浪费食物，最终食埋佢。最正常算系杯奶茶，但佢啲糖系散装砂糖，而唔系依定惯常嘅包装糖，要用匙羹𢳂起落杯茶度，自从习惯咗用包装糖之后，就觉得呢啲散装糖唔衞生。$35，两𩠌一饭加热饮，价钱系平，但我宁愿畀多几蚊甚至10几廿蚊去食啲质素好啲嘅，所以呢餐会系我帮衬嘅第一餐亦系最后一餐，除非我失忆。