韓日屋燒烤放題 (已結業)

呢间韩烧好似几多元化咁，唔止有韩国嘢，仲有日本嘢。而Openrice 又咁多好评，咁就俾个机会试下。上到去除咗见到好大个招牌，仲有好香烧烤味。环境就一般啦，店方似乎系想用哂所有位置，所以都几迫下。价钱$199加一食2个钟，最初以为唔系好够时间，原来个炉都好快烧熟啲嘢，同埋唔会好易㶶哂。侍应都会主动换牛油纸。虽然主打韩式，刺身都有十款左右，每样都几新鲜同有冰雪住。好难得韩烧有得任叫海鲜，我哋叫咗帆立贝、生蚝、海虾、仲有海鳗，不过有啲挂住食唔记得咗影相。帆立贝连壳不过比较细只，味道方面好似无点调味，如果有少少调味应该更加好味。生蚝都系细只，底下有少少粉丝，有鲜味唔腥。海虾同海鳗味道正常。之后仲叫咗软壳蟹同海虾天妇罗，炸粉唔厚，不过唔系款款都热。软壳蟹就唔热喇！到咗肉类方面，我哋叫哂咁多款牛，其中岩烧一口牛同芥末一口牛都唔错，肉质有咬口，味道都可接受。其他就唔推介了，因为唔系特别好味又阻咗个炉好多位。除咗汽水仲有啤酒任饮。甜品奶冻都唔错，奶味几香唔太甜。