鐵堂 (已結業)

星期六放工同同事食饭，拣咗呢间位于白加士街嘅新餐厅，店面装潢简洁，带有浓浓嘅和风。午市有金银铜铁四款套餐，仲做紧优惠，第二位半价，套餐内容丰富，性价比高。同事拣嘅铁餐有和风牛蒡、芥末八爪鱼、葱烧牛小排同月见饭，本来仲有一道薄烧牛舌芯，不过牛舌芯已经售罄，所以牛小排俾多咗份量。前菜感觉清爽，特别系芥末八爪鱼，非常清新开胃。牛小排嘅份量的确系特别多，葱烧味道唔错，亦唔会遮盖牛肉嘅味道，值得一赞。我叫嘅铜餐同样丰富，有腌萝卜、芝麻八爪鱼、黑松露芝士炸虾、牛油帆立贝同味噌汤乌冬。炸虾即叫即制，口感香脆，沾上特制嘅黑松露沙律酱，更加惹味。帆立贝大大只，用牛油煎到两面金黄，香气扑鼻，入口啖啖肉，令人满足。见到门面令人以为系贵价日本菜，估唔到可以食到价钱咁亲民嘅午市套餐，除咗套餐之外，仲有刺身、寿司同烧肉，下次可以一试。