酒盗 (已結業)

呢间餐厅好想试好耐，我第一次去嘅时候系平日佢已经满晒座无位，亦都证明呢间餐厅应该唔错，入边个侍应好好人好有礼貌叫我地下次去嘅时候记得订位，所以大家想试就记得要打电话去订位。我第二次系前一晚打电话订咗位先去，入到去间铺头好细间，切鱼生嘅位系开放式嘅，而啲位系围住切鱼生嘅位，即系话可以望住师傅去切鱼生，入面好干净好卫生。我哋两个人食晚巿，一个人叫咗一个海鲜鱼生饭，另一个人就叫咗八件寿司。海鲜丼 $148，好丰富，有甜虾三文鱼吞拿鱼茸带子三文鱼籽八爪鱼仲有蟹钳肉，啲鱼生食得出系好新鲜好鲜甜啲，吞拿鱼茸系入口即溶，咁既价钱咁既质素系物有所值。八件手握寿司$158，寿司大小啱啱好，唔会太大唔会太细，个鱼生师傅会根据唔同嘅鱼生去放唔同份量既芥末，啲鱼生一样好新鲜，同埋鱼生嘅厚度同饭嘅比例啱啱好。总结来讲，呢一间小店有专业嘅师傅，而且食材好新鲜又有素质，咁既价钱唔算太贵，值得一试。如果午巿嘅时候来食价钱会更加平。