台灣麵

营业中

休息中

周六返半昼，放工经过见到荃湾原来都有台湾面嘅分店，印象中佢哋嘅食物质素唔错，价廉物美，决定喺到食个午餐。嚟到嘅时候已经系下昼两点，餐厅门口依然人头涌涌，还好唔算等得耐，大概十分钟左右就可以入座。食物选择几多，主食亦有唔同嘅配搭，我最钟意佢嘅双并餐，一个价钱可以一边拣饭一边拣面，唔使心大心细。最先送上嘅系肉燥时菜，配搭嘅系油麦菜，肉燥味道香浓，加入肉松令口感层次更丰富，非常百搭。花枝丸外皮炸得酥脆，入口口感弹牙，而且仲加入花枝粒增加口感，味道鲜甜，沾上偏甜嘅酱汁令鲜味更突出。盐酥鸡外脆内软，酥脆嘅外皮底下系鲜嫩嘅鸡肉，而且非常多汁，配上轻量嘅椒盐更香口惹味。先生嗌嘅红烧牛肉面汤底微辣，味道香浓，牛肉够哂软腍入味，配上弹牙嘅面条，质素唔错。比较贪心嘅我拣咗双排双格餐，一边同先生嘅选择一样，系红烧牛肉面，而另一边就系卤肉蛋肉燥饭，肉燥香浓多汁，捞饭一流，卤水蛋亦非常入味。卤肉半肥瘦，虽然唔算非常软滑，但胜在够厚身，而且卤得够入味。珍珠奶茶奶味香浓，而且唔会过甜，珍珠亦非常烟韧，质素唔错。餐厅虽然开喺地铁站附近，但价钱相当公道，叫多几道小食亦唔会心痛，而且质素唔错，难怪成两点都咁多人等位！