漢記小廚 (已結業)

去完朋友屋企，经过启业邨大排档，决定同朋友一齐去食返餐，因为已经好耐冇见到呢一类型怀旧嘅大排档冬菇亭。去到姐姐已经好热情咁样招呼我哋，又开大个冷风机吹住我哋，仲要系我哋未点任何嘢食之前，已经过嚟帮我哋洗碗碟，同埋送咗一兜猪红俾我哋食。最后我哋叫咗一个炸蚝饼，一碟豉椒炒蚬，一个红烧豆腐煲，一碟西柠鸡，两杯冻柠茶，一支啤酒，埋单都系讲紧大概$400，我哋一行三个人，平均每个人都系百零蚊左右，食物质素更加唔使讲，系典型大排档风味，特别推介炸蚝饼！劲大份劲有镬气点埋鱼露黎食10分香口，蚝肉仲要大大粒！其他果几味小炒一啲都唔失礼，所有嘢都好好味， 10分值得推介！