影片
更多
2014-09-24
2337 浏览
八月中旬，契妹生日请食饭，新旧好友聚首一堂，大家不谈政治，只谈食经，乐也融融；全晚焦点可以话系当A友人推介新派分子料理「水月」，显示出手机内多张照片，小肥同哥哥都深深被新颖悦目o既菜式有所迷倒，更留下深刻印象。数星期后，一众表兄弟姊妹相约聚餐联谊，正当大家为地点而苦恼之际，细佬觉得机会黎啦，就提议搞搞新意思，一尝本地创作，睇吓「水月」点样去分解及重组食材 。得到各人同意后，XO仔就第一时间打电话留位，却因线路繁忙被转驳到留言信箱，幸好留言讯息中明确地指出客人可以whatsapp订座，结果全程不用真人对话，联络人随即传来订座详情，餐单、食物相片、餐厅名片及地址，双方又有记录，够哂简易方便。请留意，如果人数多，食客必先缴付五成订金。位于铜锣湾o既「水月」其实都几隐蔽，冇人介绍自己真系未必会留意到，不过交通总算方便，离各种车站都唔算远，坐地鐡就要行多少少路，而驾驶人士可选择泊架车喺餐厅对面o既珀丽酒店（$60/钟 ），又或者系较经济但远o既皇室堡停车场。「水月」门面一身落地玻璃，感觉朴素o既同时，亦特显其顶部形似水中月蚀o既暗黄招牌，妙哉！餐厅室内灯光柔和，几个角落摆放住流水灯饰及摆设，
数星期后，一众表兄弟姊妹相约聚餐联谊，正当大家为地点而苦恼之际，细佬觉得机会黎啦，就提议搞搞新意思，一尝本地创作，睇吓「水月」点样去分解及重组食材 。得到各人同意后，XO仔就第一时间打电话留位，却因线路繁忙被转驳到留言信箱，幸好留言讯息中明确地指出客人可以whatsapp订座，结果全程不用真人对话，联络人随即传来订座详情，餐单、食物相片、餐厅名片及地址，双方又有记录，够哂简易方便。请留意，如果人数多，食客必先缴付五成订金。
位于铜锣湾o既「水月」其实都几隐蔽，冇人介绍自己真系未必会留意到，不过交通总算方便，离各种车站都唔算远，坐地鐡就要行多少少路，而驾驶人士可选择泊架车喺餐厅对面o既珀丽酒店（$60/钟 ），又或者系较经济但远o既皇室堡停车场。「水月」门面一身落地玻璃，感觉朴素o既同时，亦特显其顶部形似水中月蚀o既暗黄招牌，妙哉！餐厅室内灯光柔和，几个角落摆放住流水灯饰及摆设，好衬托「水月」个名，二十多个座位连同水吧，一眼望哂。餐桌全为方形木枱，可随意拼成不同长短o既散枱，皮櫈宽阔，简洁舒适卫生。
负责楼面工作只有「水月侠女」珊珊及史提芬，二人同样温婉有礼，客气友善，换碟、加水、添酒等功夫全为自动波，服务分满泻。
食客入座不久，珊珊先问及客人选择饮有气定冇气o既水（$38/樽），并解释餐厅冇提供热水服务，但因套餐包有咖啡或茶，食客可先点热茶。我地当晚自携一枝1.8L日本清酒（餐厅收取$200开瓶费），结果七个人都系饮咗两樽水。
打开餐牌，原来当中有英文版及素菜编，好明显「水月」都好欢迎外籍及素食宾客。
送上饮料后，珊珊就为大家讲解晚市套餐中各款主菜o既特色、煮法等，以供食客参考及选择，以下为小弟未有品尝o既四味：低温蒸三文鱼配中式酸醋汁（Slow Cook Steamed Salmon Steak with Chinese Style Vinaigrette）：以低温蒸o既三文鱼质感较滑，溶于口中，配上醋汁所以唔会好溜。
珊珊推介之香煎新鲜北海道带子配蜜糖豉油汁（Scallop with Honey Soy Sauce）+ $80：北海道带子每日新鲜空运到港，外出卖价约每粒$200 ，「水月」用蜜糖汁烹调令带子如丝般软滑，系五款中珊珊最为欣赏o既。可惜，同行o既表兄弟姊妹们大多为食肉兽，未有人试尝。美国顶级肉眼扒配蒜蓉泥（US Prime Rib Eye with Roasted Garlic）+ $168：牛扒美国入口，牛肉味出名香浓。
北海道黑毛猪前肩扒配八珍山渣汁（Japanese Hokkaido Pork Steak with Bazhen Hawthorn Sauce）+ $40：黑毛猪o既肩膊位较其他部位爽口，师傅建议八成熟，肉汁会更丰富，肉质亦唔会过实。
老板娘Karen留守于厨房，为客人烹调美食，但得知我家表弟妇为孕妇时，就立刻通知表弟妇怀孕期间应避免进食山渣，并体贴地为佢所点选o既黑毛猪由山渣汁改为蜜糖汁 。准八时，幻彩水月宴正式上演，每个环节先由「水月侠女」作出详尽o既介绍，而且时间控制得恰到好处，观众绝对有足够o既时间细心欣赏及品尝 。
鲜露荀蕃茄干八爪鱼（Octopus with Fresh Asparagus & Dried Tomatoes）：头盘所用o既碟上印有一双手，据珊珊所讲，其实系意味著好友献上食物，充满热诚及爱心，有意思得很 ！冷盘中o既八爪鱼同鲜露荀都好爽脆，后者仲有一份清新感，伴碟o既蕃茄仔就好甜，加上微酸o既蕃茄汁有醒胃之效，几得意。
黄金虾（Shrimp with Salted Egg Yolk）：此乃中式分子料理之作，大厨先将原只虾连壳抽干水份，慢慢烘成虾片，再将咸蛋黄同调味粉炒炸成黄金及白雪粒，最后洒上樱花虾干。个人觉得用手食最为简单直接，薄薄o既虾片味似咸鱼，连黄金调味粒一齐食非常野味，但美中不足就系虾片唔够脆，感觉就好似净系食咗层虾壳后唔知个虾身去咗边到咁，有种莫名o既空虚感。
热石烧鲍鱼（Stone Grilled Abalone）：每位客人都有鲜鲍一只、四百度热石一块、钳一双、海带一壳。以日式石烧形式最能烧出鲍鱼之鲜味，大厨建议每边烧约八秒，因过熟质感会变得韧，食客自行烧煮可控制烟韧度o既同时，亦可以即烧即食，保持热度十足。石烧鲍鱼好爽滑，轻轻点上海带入面o既姜醋汁更能带出鲍鱼o既鲜甜味，唔错，不过细佬觉得净食海带味道真系过酸 ，虽然话有消滞之用，但如果可以轻手少少会好好多。
龙吐珠配墨鱼汁酱（Deep Fried Shrimp Ball with Longan and Crab Roe）：此道𩠌乃新鲜虾胶打制而成o既炸虾丸，内层藏有龙眼肉，咬破龙眼肉就能吐出蟹子珠，故取名为「龙吐珠」。龙吐珠外层超级爽脆弹牙，中间粒龙眼肉就好清甜，中心o既蟹子又能保持鲜嫩，层次分明，点上墨鱼沙律酱增添一份鲜香味，真系教人拍案叫绝 ！
黑松露天使面（Black Truffle Angel Hair）+ $158：大厨深信黑松露天使面应冻食为最佳，因热量会将黑松露溶解，容易流失主材及其味道。幼条o既天使面一切就断，柔软嫩脆，虽然酱汁不多，光滑得黎一啲都唔油腻，黑松露清香扑鼻，以伴碟o既鱼子酱加以点缀，整体清新香浓，简单美味！
意大利西西里红虾意粉（Sicilian Red Prawn Pasta）+ $188：酱汁用西西里红虾肴制，每条意粉都能尝出红虾o既味道，表姐夫赞叹地形容此乃全晚最感人之菜式 ！哥哥亦大赞意粉果真浓郁入味，好够al dente。
宫廷黑虎掌汤（Sarcodon Aspratus Mushroom Soup）：黑虎掌属菌类，中国历史中亦有记载为珍贵贡品之一，因其黑色o既外表形如虎掌而得其名。师傅以中材西煮烹调出黑虎掌汤，味道淡而苦涩 ，好似饮紧用药材煲出黎o既蘑菇汤咁，加咗盐同胡椒粉虽然易入口啲，不过唔系个个人都接受得到。
青柠泡泡（Lime Bubble）：青柠泡泡只有一口，酸酸甜甜，望入樽度睇唔到 ，因为已藏于饮管内，珊珊话份量刚好足以清洗一吓肠胃。表弟真系醒目，饮完𠮶啖泡泡再用饮管饮水，顺便清洗埋枝饮管 。
主菜之麻籽烤威尔斯羊架（Roasted Wales Lamb Rack with Hempseed）：「水月」所选用o既羊仔原来系未戒奶 ，所以一啲苏味都冇，四成熟呈粉红色o既肉质软嫩，正于珊珊介绍时所讲，用麻籽腌过o既外层系麻多过辣，配上白色薄荷粉末感觉四川得黎又好西方，巧妙地刺激味蕾，非常精彩 ！如果食客嫌唔够辣唔紧要，因为碟上橙色o既汁液其实系经高温处理过o既辣油，香滑野味。
芒果热情果Panna Cotta，椰子泡配云尼拿雪糕糖波（Mango Passion Fruit Panna Cotta, Coconut Foam with Gelato Light Bulb）：甜品只有一款，外形不但美观，亦系最能打动小肥o既一道。黄色圆形o既系芒果热情果Panna Cotta，酸甜幼滑，醒胃消滞。白色泡状为椰子泡泡，椰味清新且唔溜。火红色o既糖波英文名字译作为「灯泡」，非常贴切，因其外皮质感同灯泡o既外壳相似，薄脆无比，一敲即碎，内藏雪糕灯胆，集香甜脆滑于一身，捞入嚡嚡o既朱古力泥及润滑o既椰子泡沫，美味指数当然系爆哂灯啦 ！
咖啡（Coffee）：咖啡只有一款，可能因为自己饮关espresso，所以觉得味道唔够浓郁。如果「水月」可以加多个espresso作选择就最理想。
餐牌第一页注明「水月」取名于「水中月」，犹如月亮于水中之倒影会随着水o既不同状况创造出不同形态，食材亦可同样地因应不同o既烹饪技巧而制造出变幻莫测o既效果！「水月」o既烹调概念清晰，菜式独特崭新，食客可尝尽大厨o既心思及厨艺，招呼周到，晚餐约六百至七百蚊一位，虽不算超值，但价钱绝对合理。嘻嘻，XO仔已经约好咗班牌友稍后再战「水月」 ，老板娘更特别为几位长辈调整餐单，万分感激！
张贴
