赤柱大街 (已結業)

咁难得嚟到赤柱仲要系lunch time，试吓赤柱大街上𠮶啲好有欧陆feel 嘅餐厅。由于花多眼乱同埋已经好肚饿嘅关系，餐厅门口个姐姐无须大费唇舌就已经成功咁sell 到我哋行入去喇。又由于当日天气都有少少热嘅关系，我哋一班坏鬼后生放弃咗比较好feel 嘅门口位而选择咗室内嘅冷气位。经过一轮选择困难症嘅煎熬之后，终于点咗以下嘅食物：呢个都可算系全场最抵食嘅餐——大大条热狗肠加埋脆卜卜嘅薯条都只系５０几蚊，以呢度嘅环境简直系抵食过唔少茶餐厅。好一个半生熟嘅肉眼扒——有一阵炭烧嘅香味，伴碟嘅薯条亦系脆卜卜；只可惜个扒上嘅时候已经有少少冻咗。呢个炸鱼薯条绝对系值得推介——点菜嘅时候其实已经本住”爆疮就爆疮啦“嘅心理准备，但势估唔到食落口嘅时候一啲都唔觉油腻，仲有皮薄馅靓嘅感觉㖭！呢条肉肠虽然制作需时，不过绝对值得等待——热辣辣、好好食。整体嚟讲呢间餐厅令人十分满意；唯一美中不足嘅系有一两只乌蝇keep 住骚扰我哋，不过可以理解嘅系间餐厅冇门分隔室内外嘅范围，所以啲乌蝇要入嚟都真系吹佢哋唔涨。