華立茶餐廳

营业中

休息中

上個星期食完，真係有啲掛住華立粉麵 ~ 剛返到大埔，照舊睇睇苑記有無位先，首選牛什，唉 .... 無緣，咁就次選華立牛腩啦 ~ 上次天堂今次地獄 ﹗無留意係咪同上次既師父一樣，不過功夫、廚藝同用料一定唔同囉 ~ 食左十幾廿年，都係即食麵、快餐、炒野或茶餐廳野最穩陣，叫潮洲粉麵睇采數啦。牛腩撈粗麵，見上次幾好味，今次就再黎添食啦，點知質數跌至谷底，同上星期差天共地，非常差，牛腩淡而無味，散筲筲、碎濕濕，睇啲顏色跟上次淺好多，已經知道有啲唔妥。粗麵煮到過晒龍，腍劈劈、濕立立，係隻碟度仲有水係度添，伴碟生菜雖然有部份仍然爽口，但烚太耐變黃晒。蠔油生菜走油，同伴碟既生菜一樣，雖新鮮爽口，但烚太耐變黃，有部份過腍喇。