炑八韓烤 (偉華中心) (已結業)

炑八分店遍布全香港，梗有一间喺左近，沙田分店开咗咁耐，今日都系第一次试。午市韩式定食价钱由＄48至＄68不等，坐低后单都未落，店员就为我哋送上汤同埋餐前小食。我哋一行三人，叫咗鸡扒蛋包饭，炑八牛肉盖饭，同埋特级泡菜猪肉粉丝。鸡扒蛋包饭卖相吸引，蛋仲处于半流心状态，混埋啲饭一齐食都几好味。鸡扒卖相唔错，入口都算嫩滑亦唔会太干身，不过伴碟既沙律菜似乎有点儿唔夹。牛肉盖饭卖相虽然唔差，但系如果可以将烚蛋改做太阳蛋，整体颜色会更加鲜艳，更加吸引。特级泡菜猪肉粉丝：上菜后要自行即时将所有材料拌匀，粉丝入口微辣，唔会太油，猪肉亦腌得几入味。惠顾午市套餐只要加＄6就可以享用饮品，都尚算超值。我哋拣咗蓝天使梳打同埋柚子柠檬梳打，卖相吸引，特色玻璃杯仲用咗精美匙羹，感觉非常精美，蓝天使梳打入口唔会太甜，有少少柠檬味，似系柠檬梳打再加入蓝色色素。呢度嘅食物虽然唔错，但系服务态度绝对有改进嘅空间，建议店员多加留意客人嘅需要。除此之外，座位坐得非常之唔舒服，皆因枱上已有烧烤炉，若果唔烧烤嘅话，枱上嘅空间就非常之少啦。