魚八日本料理 (已結業)

同朋友上完堂之后周围揾嘢食，明明身处湾仔，但系发觉四围好多店铺都收咗。行下行下就走咗嚟厦门街嘅呢间日本嘢。我嗌咗咖哩猪排饭。咖哩嚟讲，实在唔太出众，唔辣，偏甜，典型日本咖哩，唔难食，但称唔上好食。猪扒嚟讲，因为我同朋友十点几last order时间先入席，佢唯有即席炸俾我，所以上菜时好热，值得一赞嘅系外皮，好脆。可惜猪扒就认真麻麻，声称系黑豚，但油脂嚟讲绝对达唔到我对黑䐁嘅标准，甚至有少少「鞋」。或者试过日本嘅炸猪扒真系返唔到转头，但作为喺香港用嚟止瘾嘅替代品亦略有不足。配菜反而好食，甜酸度适中，有种清新嘅感觉。另外我地嗌咗两碟小食，分别系蛋卷同饺子。先讲饺子：饺子嚟讲，除咗够热之外真系无咩特别，馅料有点少，食落无满足感，味道方面算系达标。蛋卷方面就比较出色，蛋煎得算好，唔会太老，不过如果中间保留少少蛋汁嘅话我会喜出望外，钟意佢配搭沙律酱，食落有另一种体会。朋友叫咗馒鱼饭我无试到，不过气味几香。最后，啤酒嚟讲，都系大家饮开嘅asahi咁，日本制个人认为麦味比较重，不过33蛟300几ml，值唔值就见仁见智。