PokéToké

营业中

休息中

最近爱上食Poke，上网睇到广华街嘅呢间PokéToké好似几吸引，今日就一于嚟试吓。呢度有preset嘅Poke，亦可以自选食材。所有Poke都可以选择沙律菜及/或寿司饭做base。我就建议拣Mix，有菜有饭营养会比较均衡。天气冻冻地，首先拣个暖身又开胃嘅三文鱼熬昆布蚬豆腐浓汤。呢碗汤相当足料，首先佢系用三文鱼熬制嘅汤底，鲜味得嚟又唔会太咸，而且有唔少蚬肉，仲有昆布同豆腐，非常美味。加州风味碗有我最钟意嘅三文鱼，我特别选择咗汁另上，可以自己控制份量。除咗有三文鱼，仲有三文鱼籽、青瓜粒、粉丝、车厘茄，够哂多菜少肉，再洒上紫菜丝、木鱼丝同芝麻，令整个poke更香口。夏威夷波奇嘅酱汁就用上鲣鱼酱油，更有日式风味。除咗有主角吞拿鱼，仲有蟹籽、海带、紫洋葱、枝豆，同样会洒上紫菜丝、木鱼丝同芝麻。呢度除咗poke，仲有一系列嘅小食，我就拣咗黄金炸蟹钳，原来一份有五件，其实都几平，新鲜炸起嘅蟹钳仲好脆口，放肆地浅尝一下都无妨。