王牌冰室 (南豐紗廠) (已結業)

茶餐厅嘅价钱，配合一丝不苟嘅怀旧冰室设计，充满旧日情怀，未食嘢已经有啲钟意呢度。 我哋三行人行完纱厂一圈，去到3楼见到呢间咁靓嘅王牌冰室，门口售卖啲茶饮又咁有特色，好快就一致决定入去食晚餐。我拣咗我每逢去冰室必食嘅瑞士鸡翼公仔面，加多$4 转做我以前成日食嘅福面，好怀念。瑞士鸡翼好正，咸甜平衡刚刚好，不过如果再淋一啲我就更钟意！  两位朋友就话要嗌中式小菜同碟头饭，真系好麻甩。不过原来呢度嘅炒滑蛋叉烧虾仁双拼炒饭系王牌，用咗特浓牛乳去炒，朋友畀我试咗啖，啲蛋真系特别好食。虾仁大大只，好足料。另一位朋友食嘅系西柠鸡，啲西柠甜酸调校得好好，又炸得够脆，个𩠌$68，加多$15 就有饭、汤同饮品。其实咁靓嘅环境，影相打卡都好正，啲嘢食仲要咁平。虽然跟餐有嘢饮，但最后我哋都系忍唔住喺店外嘅茶饮counter 嗌咗3杯，包括：清香桂花冻普洱、王牌鲜果茶、黄金奶盖。最吸引我嘅系杯黄金奶盖观音王！奶盖饮得多，但将咸蛋黄加入奶盖呢度应该系第一间，我冇理由唔试。咸蛋黄嘅味道撞落奶盖，原来都几夹，配合个清香嘅茶底，浓郁但唔会腻。食完饮埋嘢人均都系约$70+30 ＝ $100 咋。我只会劝大家一句：小心上瘾。