微醺 (已結業)

SOHO区众落唔少酒吧，一般三四点先开始营业； 午饭时间经过横街，如果唔系店员喺门外招徕都唔知呢度原来有做午市。以中环区以言属于中等偏高，连加一近两百嘅SET LUNCH包沙律餐汤餐包、一份主菜以及餐饮；门口属开放式，炎炎夏日下空调略有不足，餐厅后有室外座位，遇著秋分时节置身其中感觉应该会几休闲舒适。店员奉上餐牌时亦有介绍热门菜式，如risotto同all day breakfast；最后决定试试比较考验功驾嘅risotto同偏向轻盈嘅salmon fillet。先上枱嘅系呢道摆碟精美嘅沙律，加咗鲜果更清新；餐包口感松软，味道可以想像如其外观淡橙色泽般带淡淡茄酸，无一般餐包咁清寡。是日餐汤为粟米忌廉汤，入口有粒粒粟米糜，但可能因为无warm up住嘅缘故，温度算不上微温。Risotto煮得有咬口，又不至于过硬，粒粒饱满又入味，酸酸甜甜惹味得嚟无饱滞感；配料都几足，三文鱼块拌入饭中令整道菜更丰富，可惜青口偏细只。三文鱼扒表皮煎得非常香脆，调味清淡，无掩盖食材原味下丝毫无腥味；以菠菜垫底，混合鱼油油香，再加上车厘茄同西柚，食落更清新开胃。食饱后饮返杯冰凉嘅咖啡，非常解暑。