德國廚房

营业中

休息中

难得今日在大埔开工，仲可以准时松人，同事即刻话带我去威威，要去Happy Hour一下，我话乜唔系d酒吧收晒皮咩？佢话啤一啤唔一定系去酒吧嘅，佢话大埔有间德国餐厅，d德国啤酒好好饮，于是我当然系二仔底：死跟啦。呢间餐厅唔系好大，目测5至6张枱左右，不过入到去真系好surprise，因为黄昏6点呢d时间竟然已经有两枱客喺度食(我开头仲以为我地可以包场架)。由于跟住要返屋企食饭，所以斋饮无叫野食，我同事叫咗一支西柚啤，而我就试咗支无酒精啤酒，我仲问老板娘无酒精都可以叫做啤酒咩？佢话香港法例话酒精含量少过0.5%就可以叫做0酒精，讲真，入口真系好似淡口嘅啤酒，好淡好淡𠮶只，味道近似台湾金牌啤，真系呃得下人，下次有人队我我一于饮呢只，佢个名叫Bitburger Drive 0.0%。至于我同事嘅西柚啤我都饮咗一啖，少少酸，好清新好爽，好似今日咁热嘅天气就真系啱晒，我同事饮晒成支，完全无醉意，原来西柚啤嘅酒精度只有2.5%，比一般啤酒低差唔多一半，所以最后我哋两条友话就话Happy Hour，但系就全无醉意咁离开。题外话，我见隔离枱只猪手都好似好正，下次一定再黎试埋。