心夜來潮 (已結業)

今日去完旺角行街，就想附近食埋饭先返屋企。经过西洋菜街见到个s/b写住心夜来潮，系食潮州野，见到menu价钱都ok就决心入去试下。可能我地唔够7点就入去食饭，所以都无咩人，唔洗排队。入边系用木枱木櫈，有少少感觉真系去左大陆咁，几有传统古早味道。我地因为唔算太肚饿，所以多数叫小食，唔太饱肚既野。本身见到酱卤六小碟好吸引，但朋友唔钟意食大肠，所以我地就叫左双并，要猪腩肉同豆腐。味道都几出色，特别系猪腩，都几稔，配埋白醋同辣椒好岩做餐前小食。另外，食潮州野一定必点蚝饼。佢呢间系用鸭蛋整，食得出同外面有少少分别，而且煎得香口，唔会好似食紧成团粉咁，真心唔错，如果配埋啤酒更好，可惜最近唔饮得。我地惊晏d会肚饿，就叫埋炸馒头。炸馒头就不过不失既，炸得几松脆，而且唔系小馒头，不过食两旧已经滞滞地。最后我地无叫冻野饮，反而健康d叫左盅炖汤黎饮。估唔到几足料，我地叫左海底椰百合响螺头汤，好清润。我忍唔住饮左3碗，而且饮完唔会好口渴，抵赞。埋单都系3百几，2个人食到饱一饱，仲几岩口味，下次呀爸生日可以再黎食。