Primo (已結業)

告士打道由湾仔至铜锣湾嘅路段其实都有好多高质素嘅餐厅，因为地段关系晚市时段亦唔难揾位，今日一个喺湾仔返工嘅朋友就约咗我嚟呢一间Primo。首先拣咗巴马火腿蜜瓜卷作头盘，总共有4件，而且卖相精致。Parma Ham卷起成小杯状，再放入蜜瓜同带有微微薄荷香嘅珠珠，口感清新。热带烟三文鱼薄饼嘅饼底系佢哋餐厅自家制作，手工薄饼口感果然唔同，而且非常新鲜，而佢嘅材料除咗有烟三文鱼外，仲有菠萝蜜饯同芒果甜酸酱，令薄饼充满热带果嘅味道，而洋葱、甜椒同埋火箭菜就减去咗薄饼嘅油腻感。另外仲叫咗一个手工意粉，我哋拣咗带子虾烟肉卡邦尼酱，店员推介我哋配扁面条，首先佢嘅份量系超多，就算share嚟食都够饱有余，而佢嘅卡邦尼酱汁味道同样出色，与大大粒嘅原只带子、大虾同烟肉配搭得宜，最重要嘅系佢嘅手工意粉烟韧弹牙够爽口，绝对值得一赞！原本都打算叫个甜品，但实在份量太多，大家都觉得好饱，所以留待下次再试其他啦！