小食•棠 (已結業)

小食 • 棠，店如其名，賣嘅就係一般港式小食：魚蛋燒賣雞翼雞髀多士三文治撈麵撈丁頹飯等等等等，食物大眾化，價錢親民，三四十蚊就食到個肚飽一飽。必食推介爆炸魚蛋，十蚊有五大粒，非常抵食，之前曾經有街坊請我食過，驚為天人；今次再試，新鮮熱辣，肉質彈牙，食到陣陣油炸嘅香氣之餘又唔會覺得好油淋淋，真係好正👍。叫多個店家推介嘅豬頸肉雞蛋芝士撈麵，豬頸肉份量算多，肉質軟腍（ 我最怕好似柴皮嘅豬頸肉😂），醃得頗入味；醬汁嘅芝士味雖然唔算好濃，但份量又係勁多，撈埋成碗嘢嚟食，其實好膩，不過又好滋味🤗。店嘅面積雖然好細，得幾個堂食座位，但到處都係文宣同連儂牆，門口仲擺咗一張枱畀人寫 memo 紙，張枱仲闊過我食嘢張 bar 枱，可見在老闆心目中，孰輕孰重。我忽然想起聖經故事入面奉獻兩個小錢嘅窮寡婦 ❤️。