燒味滷師 (成城大廈)

营业中

休息中

屋企附近最近新开咗间烧味舖，有唔少街坊帮衬，今日懒得煮，索性斩几味加𩠌，返去焯碟菜心就开得饭。烧味价钱合理，新开张仲有唔少优惠，特别系烧味饭盒，无论单双拼都系一口价廿二蚊，非常抵食。大热天时见到海蜇拼泰式凤爪零舍吸引，海蜇口感清爽弹牙，凤爪亦同样爽口，去咗骨一啖一只刚刚好，酸辣开胃。先生至爱食烧鹅，见咁耐冇食，拣咗下庄，果然冇令人失望，鹅髀大大只，够哂肥美，肉质非常嫩滑，连皮咬落去，满口鹅油香气，令人回味！除咗酸梅酱之外，仲有一袋仔烧鹅汁，原汁原味，无论淋上烧鹅到食抑或系捞饭都一流！客家盐焗鸡大件夹抵食，肉质滑溜而且够哂咸香，绝对系白饭杀手。叉烧半肥瘦，一打开外卖盒已经香气四溢，色泽鲜明，入口肉质软腍，蜜汁亦够香够入味，水准唔错。烧味店食物水准唔错，特别系烧鹅，只烧鹅髀简直令人回味，钟意食烧鹅嘅绝对唔能够错过，而且烧味价钱够晒亲民，最值得一赞嘅系店面干净整洁，俾人嘅感觉非常卫生，难怪咁多街坊客捧场，希望能够一直保持水准，等我哋可以继续食到优质嘅烧味。