羅富記粥麵專家 (已結業)

罗富记系男朋友好喜欢嘅食店之一，几十年前父母已经带佢黎，当时蚬介鲮鱼球都唔系度度有得食。到中学时代喺股票行做暑期工又成日买及第粥、腰润粥食，满满个人回忆。中、上环一带有三间分店，黎到皇后大道老店，平日特别多写字楼上班族，假日反而松动啲。餐牌供应云吞、水饺、牛腩粉面等，粥品、捞面，人均三几十蚊。点左个面、粥同鲮鱼球，十分钟左右上齐菜，前后半粒钟埋单。我就一向唔钟意滚水渌脚食饭，所以好少肯陪佢食呢啲餐厅猪腰滑牛双拼粥 $44平时多数点腰润粥，当日就唔想食润，拣左猪腰拼滑牛，基本上呢类传统老店个粥都唔会差，粥底几绵，虽然就唔算好香。猪腰都唔系好多地方有，而且遇著洗得唔干净嘅就濑野，食咁耐罗富记都冇问题，几爽口。滑牛嫩腍，份量不多。天气虽然热，但佢都好钟意食粥，年纪大嘅象征。云吞面 $32云吞面正常野，面质爽，云吞系细粒野，冇乜特别。蚬介鲮鱼球 $22/小小份三粒，新鲜炸起，都几大粒架。最重要系鲮鱼肉落得足，唔系粉球，亦都好有弹性。蚬介味鲜，男朋友最爱两个人食一旧水落楼，都系合理范围。唔系必食，不过男朋友食番自己嘅个人回忆，表示满意