Felice Cafe & Pasta (已結業)

年二十九，约咗朋友行维园花市，去之前食个lunch先。好耐之前嚟过呢间餐厅食Dinner，印象中嘢食唔差，今日就带朋友去试吓，原来佢哋有午市套餐，选择都唔少，佢哋应该会一段时间就会转餐牌，而且款式都几特别，今次去食，同上次去完全唔同。睇吓今次有咩特色意粉先，冬阴功忌廉海鲜扁意粉？个名好特别，唔知好唔好食呢，钟意试新野嘅我梗系要试吓先啦，稳阵起见再叫多个烧汁豚肉意粉，每个餐都包沙律&饮品，可以加钱转特色咖啡或特饮。冬阴功忌廉海鲜扁意粉 - 有惊喜，望落似白汁意粉，食落有强烈冬阴功味道，会食上瘾，必食！烧汁豚肉意粉 - 卖相还可以，但系味道超好食，酱汁味道好，食完冬阴功，再食呢个，都食得到烧汁味道。好特别，食完烧汁豚肉意粉，再食返冬阴功忌廉海鲜扁意粉，又有另外一种味道。今次试咗佢哋ice mocha & 黑糖鲜奶咖啡，2样都唔错，咖啡味道浓郁，不错选择。餐厅位置不多，但客人好多，所以都要等位，我哋好好彩，等咗大约10分钟就有位，价钱实惠，高质食物，特别钟意佢哋嘅意粉，煮得好好味，值得推介。