快靚正燒味粉麵茶餐廳 (已結業)

呀妈话今晚有亲戚上黎食饭，俾左几百蚊我去斩料加送。就落左街去平时食开果间茶餐厅斩几味啦！舖头一边主要系堂食既粥面茶餐厅，另一边系烧味粉面同外卖斩料。烧味有好多款选择，因为样样都想食，所以就每样斩啲。烧鹅胀卜卜，好肥美，叉烧红当当，有肥有瘦。有切鸡有油鸡，大大只。先先斩左叉烧同烧排骨各半斤。个磅向住客人，几重几钱一目了然！蜜汁沾满每一寸，甜甜地。烧骨同叉烧啲肉都好林，肥瘦适中，食落个边有少少焦焦地，好味！乳猪 一斤平时多数去饮先会食到乳猪，难得可以斩料，就二话不说要乳猪啦！斩果时已经听到chock chock声，好脆！职员提我地返到屋要打开个盖，以免林左。只乳猪都几好肉，摆到食饭时啲皮都仲系好脆口！点埋个甜酱食一流！乳猪真系烧味既一哥！烧鹅 下庄够晒肥美！肉质食落去较实净，个皮好薄，可以同肥肉分开，好香烧鹅既味道！油鸡 半只油鸡肥美，半只都好多下，鸡肉好嫩滑，爽口。个人中意食油鸡多过切鸡，因为较惹味，个鸡皮充满住酱油既味道！平时都系系度食粉面多，今日食埋佢个斩料，都唔错！呀妈都好满意！斩料个老细都好好讲，会介绍下食咩好，下次唔知买咩送时可以落黎斩几味！