海南

营业中

休息中

同朋友去完坚尼地城鲁班庙下面条长楼梯影相，打卡。之后见到间「海南」，个餐厅名喺社交平台啲坚尼地城街坊群组见过，决定试吓。餐厅外围摆放咗些花花草草，虽然系假花假草，但感觉又几温馨。餐厅内部面积不算大，主要以深色木系装饰，舒适企理。谂左好耐都拣唔到食去骨海南鸡定红烧状元蹄好，点知店员介绍$83可以双拼，最后就点左个双拼！到上菜一刻，见到原来除咗海南鸡同元蹄外，仲有菜心，摆盘都算几好，加上独立一碗黄饭同冬瓜汤。至于酱汁方面，有一碟三色酱，入面分别装有甜酱油，姜蒽油同酸辣汁。仲有一碟汁，问店员先知原来系元蹄汁，佢话个元蹄汁唔淋上元蹄系避免影响到海南鸡个原味，呢一点好细心，值得一赞！海南鸡嫩滑有鸡味，鸡皮嘅油脂亦晶凝通透，配埋个酸辣酱，更加开胃更加爽口。个黄饭色泽金黄，粒粒分明而且好香干葱同蒜蓉味。元迹肥瘦参半，食落够淋而且好香药材味。菜心就无特别，不过不失。最后个例汤应该唔系味精汤，清新冬瓜幽香加上淡淡元贝鲜甜，正！总结：性价比高，值得下次再试，店员特别亲切。