加多樂冰室 (已結業)

平时喺新蒲岗番工都唔觉有呢间野，有日同事话想试下，我心谂，四十蚊左右一个餐，同出面差唔多啦，如果味道唔太差都叫合性价比丫，试下亦无妨。入到去，好似几干净下，唔似普通茶记feel，比传统冰室多咗一份modern感，灯光唔会过猛，D櫈都几靓仔(我钟意坐硬櫈多啲，唔怕上一手整湿咗都唔知)。望住Menu，都系啲冰室会有嘅野，价位好似都几合理，最后嗌咗个「常餐」，雪菜肉丝米跟双煎太阳蛋同埋我至爱嘅多士，跟餐饮杯热柠水都唔洗加钱，四十蚊搅掂，而且上菜都尚算快，速食lunch一流。常餐(雪菜肉丝米/双煎太阳蛋/多士)($39)算系咁啦，米粉大大碗，粗身啲，唔怕太硬哽胃，雪里红唔梅唔散，好新鲜爽口，嚼劲十足；双煎太阳蛋内外合格，唔欢喜仲可以转炒蛋又得，荷包蛋亦得；至于多士喇㖞，一个字「热辣辣卜卜脆」，绝对吸引到我回头再食！薯仔鸡翼饭($43)呢个系同事叫嘅，望落好似都好大碟，份量十足，佢仲话好有家嘅味道，食到上哂瘾咁话。我都食咗两三啖，又真系几住家饭feel，唔太浓唔太清，唔觉有味精，岩岩好，劲想偷多佢一旧薯仔同鸡翼食呢。