大喜屋 (已結業)

中秋节同女朋友屋企人食完饭，翌日得返我哋两个自己揾食都梗系要食餐好啦。今日喺铜锣湾出没，就拣咗大喜屋呢间性价比极高嘅放题。佢嘅嘢食绝对冇令人失望，好似刺身咁样样都好新鲜，好似象拔蚌、甜虾、荣螺等。尤其是系贝类，赤贝就好鲜甜，带子系一大粒再切细粒，所以绝对唔系细细粒嘅带子仔。另一惊喜就系呢度有盐烧左口鱼变寿司，一般出去食呢个寿司都要10几蚊件，可以喺放题食到呢个寿司真系值回票价㗎。除咗左口鱼之外呢度仲有海胆手卷，好窝心地呢度嘅手卷系迷你手卷，绝对唔会要你食少少𩠌大大嚿饭。海胆都好鲜甜美味而且细细件，好快食完令你不知不觉想叫多几件食。羊架亦烧得啱啱好，唔会太过苏，而且唔会好似出边啲放题咁死咸烂咸，佢调味十分出色。网烧牛肉嘅生熟度刚刚好，食落肉质刚刚好又有牛味，再有小小沙律伴碟，食完真系好fresh架。因为食咗好多刺身，所以就叫咗个人参鸡食。有参香之余，仲有菜汤嘅鲜味，整体味道甘甜真系令人饮到唔停口。最后每样甜品都叫左少少，最令人惊喜嘅一定系个榴梿糯米糍，咬落去个馅全部都系榴梿肉，如果钟意食榴梿嘅你，一定会觉得齿颊留香，忍唔住会再encore。