嘉寶漢堡 (和益中心)

营业中

休息中

8:00去到谂住都要等下位点知发现入边即刻就有位，即刻9秒9冲入去霸咗个靓位先。呢度其实系好似快餐店咁自己攞位然后去返门口买，买完比部机仔你整好就叫你过去。首先叫咗个最基本嘅芝士牛堡，个包系软熟嘅，个牛就唔算好多肉汁但系味道都唔错，当然你同𠮶啲手打牛就冇得比但系呢个价钱性价比都好高。另外我哋仲叫咗香辣烟肉蘑菇芝士牛堡，我个人食burger系比较钟意有烟肉，呢个烟肉辣辣地再配合埋切碎咗嘅蘑菇非常之夹。相比起最基本嘅芝士牛堡呢个的确系好食好多，呢$12系抵比嘅。另外加$16就有套餐，套餐包括一个嘢饮同埋一款小食，我哋今次就叫咗薯条同埋炸烧卖。先讲炸烧卖因为比较特别唔系度度有得食，其实如果真系贪佢叫做特别啲，咁都可以食下嘅，否则我自己其实都系钟意蒸烧卖配合豉油同埋辣油。呢个炸烧卖出边脆脆地但系感觉有少少黐住啲牙，虽然口感几过瘾但系味道就普通啲。薯条方面系厚切，都几脆，除此之外就冇乜特别啦。整体嚟讲虽然你唔可以同𠮶啲卖到好贵嘅手打牛堡相比但系以呢个价钱讲真喺边度揾，佢可能只系贵麦记少少但系味道就好食好多，所以呢间嘅性价比非常高。