森戶 (官塘立成大廈) (已結業)

新年本身想约朋友食新年饭，点知就禁咗堂食，唯有约早啲食个「早晚餐」。森户分店有好多间，今次就去咗牛头角分店，都几近地铁站。我地去到已经四点几，睇睇餐牌发现餐厅做紧抗疫优惠，竟然Omakase「户」同「山」堂食同外卖自取第二位都有半价。另外12至6点单点都可以有9折。我地最后都系决定食lunch set，套餐会跟埋面豉汤同茶碗蒸。我地就拣咗一丼饭一寿司拼盘。特上北海丼 ( 吞拿鱼 , 油甘鱼 , 带子 , 海胆 , 牡丹虾 , 三文鱼籽 , 三文鱼 ) 超级丰富嘅海鲜丼，有成八种刺身！呑拿鱼系拖罗位，非常肥美，油脂感十足。海胆新鲜creamy，无腥味。带子都好厚切，够鲜甜！份量好十足，二百蚊唔使都几扺食。寿司拼盘（吞拿鱼腩, 帆立贝, 三文鱼, 油甘鱼, 金线鲷, 池鱼, 真鲷, 甜虾, 葱吞拿鱼腩, 三文鱼籽 ) 拼盘总共有十件寿司，师傅手势都好好，每件都握得好靓。估唔到会有金线鲷同真鲷呢两种鲷鱼，味道好鲜。另外仲有葱呑拿鲜同三文鱼籽都系我最钟意嘅肥美之选。配埋嘅茶碗蒸都好滑，适合清清味蕾。我地另外仲加上几串串烧串烧鸡肾、鸡翼、五花腩串、牛舌烧得好有火口，外面烧得脆口，内里又唔会干身。