御泰坊-泰越菜 (已結業)

疫情关系，冇得同屋企人出去食饭庆祝生日，唯有买外卖返屋企一齐食，最近好多外卖都有折，意外发现原来呢间餐厅都系king’s parrot group!而家做紧六折劲优惠，买咗几个𩠌返去一齐食。咖喱面包软壳蟹- 外卖包得好仔细，三样嘢仲要系分开上，唔怕面包同软壳蟹浸到淋晒。面包比起堂食较靭，软壳蟹就保持到香脆，而且份量都唔少！咖喱好香，点面包真系一流！蒜蓉炒芥兰- 估唔到普通嘅炒菜菜式系最高评价嘅，每个人夹起都觉得炒得非常之香口，颜色也保持翠绿，食得出芥兰菜非常新鲜柔嫩，系最快清晒嘅一碟！泰式菠萝炒饭- 同餐厅比，就系少咗个菠萝壳，肉松、炸腰果、菠萝粒、肉碎、杂豆，材料十足，外卖都系咁好食！另外仲叫咗软壳蟹纸米卷同埋炒金边粉，纸米卷包得好靓，馅料填到胀卜卜，配埋酸甜汁好开胃！生菜肉碎包青柠同香叶味都好突出，个个食到舔舔脷！金边粉少少酸酸甜甜都唔错，系冻咗少少有啲黐埋一旧旧，不过呢d一定系现场食最好食！折咗之后咁多样食物加埋都系三百几蚊，真心非常抵，希望间餐厅可以挨过呢个疫情！