阿麥廚房 (已結業)

今日同好友行完街街就去加路连山个边揾食，方便食完去攞车走，系丹麦行入去少少就见到阿麦厨房，见到外面有幅画几得意，就被吸引左入去。同朋友商量好之后，我地就叫左两个餐，前菜就叫左凯撒沙律同大虾占米多（加$58）。 大虾占米多原来系原条烧虾，都几juicy 同新鲜。 汤我地就叫左南瓜蟹肉汤同黑松露菌忌廉汤，每个加$58，我就食黑松露忌廉汤，松露味浓汤又滑，朋友话佢碗南瓜汤好浓郁，味道配上蟹肉刚好。主菜我地拣左烧猪手同带子黑松露野菌意大利饭，意大利饭充满黑松露味，口感刚好不太硬或软身，带子煎香左两面，里面仲软淋淋，外脆内软。最后烧猪手一到，我同老友都好惊食唔哂，因为猪手同薯条都好大份，烧猪手唔太咸，猪皮香脆猪肉软身，连薯条都好好食。餐饮佢都几多有好几个选择，我叫左cappuccino ，到佢送黎先知原来3D 架 ，好得意呀!为食总结：烧猪手系好味抵食推介。