火狐爐端燒 (已結業)

今日同朋友去完荃湾shopping之后喺附近揾嘢食，大家又唔算话好肚饿，但系又想揾个地方坐下食少少嘢，喺附近见到有间舖头系食炉端烧，大家都话想去试下。店内唔算好大，主要都系食串烧为主，见到墙上仲有秋冬特选迷你火锅添，所以我哋都拣咗个寄世海鲜锅试下。寄世海鲜锅材料都几丰富，有虾🦐、蟹柳、帆立贝、蚬、娃娃菜、菇同埋竽丝，啲海鲜都好新鲜，帆立贝同埋蚬都好大粒，最重要系个汤底，虽然只系清汤，但个汤吸晒所有海鲜嘅味道，变得好鲜甜，我都忍唔住系咁饮！串烧方面拣咗至爱嘅和牛串、黑豚五花腩同埋冬菇串，和牛肉嫩多汁，和牛味颇出；黑豚五花腩肥瘦得宜，唔会话肥得太过份，带有少少肥膏嘅香味，加少少柠檬汁一流呀；冬菇串烧得够干身，但咬落去依然保存到juicy嘅口感，上面仲有啲木鱼丝喺度郁下郁下，味道不错不错！我哋仲叫咗个烧墨鱼饼，见到个卖相都好靓啦，金金黄黄，带点香口嘅感觉，墨鱼肉新鲜，爽口又弹牙。今次因为大家都唔太肚饿，所以都叫得唔太多嘢，其实都仲有好多款串烧想试下架，有机会再嚟试过其他款式先。