牛屋餐廳

营业中

休息中

今日约咗个朋友收工食饭，因为要去一转尖沙咀先，朋友就推荐食牛屋。由尖沙咀行到佐敦，貌似好远距离，其实15分钟左右行到，地点非常方便。舖头无论门面定内里装修都非常有气氛，好有以前旧式扒房嘅感觉。我哋食20:30，入坐率都有8成。门口餐牌大概就系晚餐主打。我同朋友都叫咗精选套餐里面嘅纽西兰牛柳，佢5成我7成，而所有套餐都包餐包餐汤同野饮。餐包上枱仲热嘅，已经帮你搽埋牛油，走油嘅朋友要注意！餐汤都系红白两款，我地都拣红汤，味道不过不失，但份量都大碗。主菜方面，牛柳有手掌咁大亦都非常厚，即使咁厚都做到5同7成嘅分别(朋友个块明显红啲），虽然好基本，但宜家好多餐厅都做唔到，所以值得一赞！其次系就算我叫7成都唔会太韧，好易切！而伴碟嘅薯条份量亦非常足够，普通女仔一定会劲饱！埋单每人$196，坐足两个钟，无人吹无人赶，美中不足嘅系无鐡板，但食物高质，气氛一流，可以encore。