佐賀山田 (已結業)

打风最好做乜？梗系去食啦，因为除咗餐厅所有舖头都闩晒。趁呢个风咁鬼弱，我决定同老公去青衣佐贺山田食烧肉。餐厅有shabu shabu同烧肉分开坐两边。因为上星期先食完shabu shabu，所以我哋今次拣食烧肉。出边有好多配菜同饮品雪糕任拎。啤酒都系加$58就可以任饮，好抵。我地简左松放题（$398），因为有我最钟意食甲罗烧，真系唔怕胆固醇高的话食多几个就回本。而且呢个set最多牛肉款式啱晒我哋两个牛魔王。呢个价钱已经有135品，性价比高过牛X好多。牛肉方面基本上都有原味，烧肉汁，盐味等等几只味入嚟夹硬。除咗牛肉之外猪鸡都有好多唔同款式，带子大大只，海虾都大大只，仲有生蚝添。基本上一样食一件都食唔晒。火炉亦够猛，唔会烧极都烧唔熟，基本上我地密密手，一个钟都饱左7成。不过临走俾我发现下昼仲要系$298咋， OpenRice仲有八折coupon,下次一定要下昼再嚟食。