Green Waffle (已結業)

午巿上面书打卡送指定味道雪糕一球，加落跟餐窝夫一齐食都几吸引。但今餐无享用呢个优惠，因为食到尾段已好饱，唔想嘥嘢。饱，在于叫咗个脂肪度爆棚的牛排粒薯粒镬仔（个名超古怪），见到实物后，帮佢改叫镬仔牛排粒脆薯配流心蛋。份量唔大，脆口嘢自然油份高，越食越肚胀。加只流心蛋一齐食，入口冇咁油腻。牛排粒生熟度刚好，另混入香菰做配料，令卖相丰富啲，望落唔觉牛排粒特别少。为咗平衡呢个重口味餐，叫多个烟三文鱼忌廉芝士卷伴粟米及薯仔沙律。菜如其名，一个大碟上放齐呢三样食物。粟米多汁易刨（冇错，系用刨的方式去食）；三文鱼卷味道略寡，鱼肉色水颇淡，加多啲忌廉芝士同青菜就好喇。跟餐甜品半份窝夫的外层有啲硬，切开见唔系厚身版，同咖啡弄的出品正好相反，味道正正常常，都系钟意食厚身窝夫多啲。餐饮热咖啡味道好，配窝夫食最夹。比食物更值得欣赏系店员服务细心周到，赞。